صلّي العيد وتعالي
سالقالك لحمة كتير
اوعي ياواد تتعالي
انا عاملة رقاق وفطير
عاملالك طبق شوربة
ينهي علي أي كربة
ميحسسكش بغربة
متخافش السر ف بير
مش حقول فطّرتك
كُل هنا وهناك
اديني اهو فكرتك
تعالي حستناك
طول الليل ع القهوة
الصبح تجيلي واقع
تعالي شق ريقك
متجبش معاك الساقع
انا عندي كل حاجة
روح بص ف التلاجة
أمك خيرها كتير
مستورة ومش محتاجة
وحشني يامه حوارك
يامكافحة في مشوارك
كنتي عارفة أراري
كنت عارف أرارك
عمرك ماكنتي أم
كنتي الأخت الكبيرة
أول مايصيبني هم
اجري واقول ياكبيرة
لو امي زعلتني
كنت آجي اشتكيلك
ولو اختي ف يوم جرحتني
اجري علي طول واجيلك
وحشتيني يامه
سيبتيني ليه ف غمة
بدعيلك كل دقيقة
زي مادعيتلي
ربي يرزقك الجنة
ورؤية الرسول
عروسة ف ليلة حِنة
غيابك مش معقول
آه م الذكريات
وسنين عمري اللي فات
عمري ف يوم ماانساكي
دي حياتي هيه هواكي
مشتاق يامه لضمة
مشتاق يامة لضمة
د. هشام سليم
شاعر الحرافيش
تعليقات
إرسال تعليق