نفسي جوايا محبوسة
تقلش ياخال ملبوسة
وراكبها ١٠٠ عفريت
من عفاريت الحواديت
زهقان وبقول ياريت
اتنيّل واخلص بقي
الدايرة بقت ضيقة
والخنقة بقت مشنقة
وروحي متعلّقة
بين السما والأرض
بين الثقة والفرض
بين الخير والشر
بين الرضا والأر
بين الانبساط
والعيشة باستعباط
وارقص وف إيدي صاجات
وبين اللي أنا فيه
وبين اللي بلاقيه
قرفان بقول إفِّيه
من ريحة الدنيا النتنة
من الشهوات والفتنة
واسبح ف الملكوت
وساعات بتمني الموت
بس مفيش استعداد
اقف أدام ربنا
أدام رب العباد
الوقفة مش هَيّنة
يارب اهديلي حالي
وخفّف م اللي بيجرالي
وحقّق كل آمالي
واسترني فوق وتحت
وبموتي أكون ارتحت
وخلّي قلبي يميل
لفعل كل جميل
أنا مش أد عذابك
أنا مش أد الويل
طمعان أنا ف غفرانك
راح حسيب الدنيا عشانك
سامحني ع اللي فات
قوّيني ع اللي جَيّ
واهديني لمحبتك
طول
ماانا لسه حيّ
د .هشام سليم
شاعر الحرافيش
تعليقات
إرسال تعليق