( بنداري حاجات )
بنحاول نُسكت ونخَبّي ونداري حاجات
ونحاول على قد ما نقدر نظهر بثبات
مش جايز يعني إن سكوتنا أفضل بكتير
من إننا نحكي ونتكلّم في اللي خلاص مات
خلّينا خلاص يعني في حالنا وخلينا ساكتين
ونحاول نصبر ونكمّل زي ما ماشيين
أيام العمر اللي هتيجي طبعاً هتعدّي
زي ما عدّينا كتير ياما م العمر سنين
مابقاش مسموح إننا نشكي أو نعرف مالنا
من بعد سنين عِشنا بنكدب ونصدّق حالنا
نضحك على روحنا وبنصدّق كل الحكايات
بنحاول نسكت ونخبّي ونداري حاجات
بنحاول دايماً نتأقلِم مع شئ موجود
مع واقع صعب كتير جداً أصبح مرفوض
عايشين ساكتين على أوضاعنا وعاملين راضيين
والصبر خلاص شطّب فعلاً ومالوهش وجود
بنحاول نظهر سعادتنا اللي ماهيش موجودة
بنحاول نفرح باللمة اللي بَقت محدودة
بنحب ونضحك وبنفرح من برة قلوبنا
علشان فرحتنا الحقيقية صبحت مفقودة
بقلمي عبد
الحميد وهبه
17/12/2023
تعليقات
إرسال تعليق